ILOILO CITY – Gin aprubahan na sang Iloilo City Council ang proposed ammendment ukon ang pag-ilis sang regulation ordinance no.2017-053 ukon Ilonggo Centenarian Ordinance nga nagahatag sang dugang nga benepisyo kag prebilihiyo sa mga residente sang syudad naga edad 100 anyos.
Suno kay Iloilo City Councilor Jay Treñas, chairman sang committee on appropriations, may yara sang bastante nga pondo ang syudad agud nga mahatagan sang cash incentives ang mga katigulangan.
Ang tanan nga naga edad 80 anyos ang makabaton sang P10,000; ang mga naga edad sang 90 anyos ang makabaton sang P20,000 kag kun 100 anyos ang makabaton sang P50,000.
Mahimo nga makuha ang cash incentive kun mag edad mismo ang isa ka tigulang sang 80, 90 kag 100 anyos.
Ang katuyuan sang pag-ilis sang ordinansa amo nga panubu-an ang age bracket agud siguraduhon nga ang mga senior citizen ang makabaton sang ila cash incentives agud man nga ma enjoy ang nahatag sang gobyerno sa ila.
Nahibaluan nga ang author sang nasambit nga ordinansa amo si Liga ng mga Barangay President Irene Ong.
