ILOILO CITY – Indi pa makumpirma ni Iloilo City Mayor Jerry Treñas kun bala nakabayad na sang tax liability ang Panay Electric Company.
Ini ang kasunod sang pahayag ni Atty. Estrella Elamparo, legal counsel sang Panay Electric Company, nga nakabayad na ang kompanya apang indi niya mapat-ud ang kantidad.
Sa interview sang Bombo Radyo kay Treñas, iya ginpahayag nga temprano pa siya nga naghalin sa Iloilo City Hall subong nga adlaw rason nga wala niya maaktuhan ang pagbayad ang Panay Electric Company.
Suno kay Mayor Treñas, santo sa ila ginkasugtan, magabayad ang Panay Electric Company sang P134 million nga buwis antes ang Disyembre 12 nga auction sang propidad sang kompaniya.
Ginpahayag ni Mayor Treñas nga sa iya pagkahibalo, full payment ang pagbayad sang Panay Electric Company kag wala na sang extension nga ginhatag.
