ILOILO CITY – Daku ang posibilidad nga makuha sang Pilipinas ang 2nd back-to-back win sa Miss Universe history.
Ini ang kasunod sang ginpatigayon nga preliminary competition sa diin isa ang pambato sang Pilipinas nga si Gazini Ganados sa mga nagpanguna sa kompetisyon.
Sa exclusive interview sang Bombo Radyo kay Norman Tinio, pageant expert/blogger, iya ginpahayag nga indi mahinago nga isa si Ganados sa mga strong contender kaupod ang pambato sang France, India, Colombia kag Thailand.
Suno kay Tinio, maayo ang performance ni Ganados ilabi na sa swimsuit competition kag wala man nagpaulihi sa evening gown kag national costume nga pinasahi sa tanan.
Ginpahayag ni Tinio nga magluwas sa preliminary competition, isa man sa basehan sa pagpili sang Top 20 nga magapadayon sa Miss Universe pageant amo ang closed-door preliminary interview kag iban pa nga aktibidad nga ginpatigayon.
Kun si Miss Universe 2015 Pia Wurtzbach ang makabig nga surprise win kag si Miss Universe 2018 Catriona Gray ang makabig nga sure win, ginpahayag sang pageant expert/blogger nga best win naman si Gazini Ganados.
Sa tion nga mapaslawan sa back-to-back win, ginpat-od ni Tinio nga makasulod ang 23 year-old Cebuana beauty sa mga runner-up.
Nahibalu-an nga buwas, Disyembre 9, patigayunon ang coronation night sa Atlanta, Georgia kun sa diin lunsay mga babayi ang magabug-os sa selection committee.
Lauman suno kay Tinio nga ang program flow ang kasubong man sa 2018 Miss Universe sa diin pagapilion ang top 20 contestants nga amo ang magahatag sang opening statement, pilion ang top 10 nga amo ang magapasundayag sa swimsuit kag evening gown, pilion ang Top 5 nga amo naman ang magapasundayag sa question and answer, pilion ang top 3 nga amo ang magasabat sa common question kag ini ang basehan sa pagpili sang Miss Universe.
