ILOILO – Wala sang katupong nga kalipay ang nabatyagan sang swimmer sa secondary boys matapos gin break ang kaugalingon nga record sa Iloilo Schools Sports Council Meet 2019.
Sa exclusive interview sang Bombo Radyo kay Alexander Xian Quiton, 14, grade 8 student sang Colegio del Sagrado Corazon de Jesus kag tumandok sang Miag-ao, Iloilo, iya ginpahayag nga nag-umpisa siya sa paglangoy sang siya ang naga-edad sang 11 anyos.
Suno kay Quiton, nagtuon siya sa paglangoy sa isa ka private resort sa banwa sang Alimodian, Iloilo kag sang nakita sang amay ang iya abilidad bilang isa ka swimmer, ginpanugyanan siya nga mag-training kag magpasakop sa kompetisyon.
Si Quiton ang nakahampang na sa Palarong Pambansa 2018 sa Vigan kag nakakuha sang 1 gold, 2 silver kag 1 bronze.
Luyag ni Quiton nga makapasakop liwat sa Palarong Pambansa rason nga ginhimo niya ang tanan agud magpangibabaw sa 50 meter butterfly.
Na-break ni Quiton ang iya record nga 28.47 seconds kag nakahimo sang panibag-o nga record nga 27.43 seconds
Samtang, ginpakigbahin naman sang coach ni Quiton ang sekreto sa pagkuha sang bulawan nga medalya sa swimming.
Sa exclusive interview sang Bombo Radyo kay Romeo Janeo, iya ginpahayag nga lakip sa mga ginhimo ni Quiton agud mangin madinalag-on sa swimming amo ang disiplina kag constant practice.
Nangin dako man nga rason sa maayo nga performance ni Quinton ang suporta nga ginahatag sang iya ginikanan.
Suno kay Janeo, natukiban ang abilidad ni Quiton sa 1st Congressional District Sports Association meet sa Miag-ao, Iloilo.
