ILOILO – Nakapatigayon na sang pagsinapol ang Anilao National High School nga nagatiglawas sang 4th district kag Department of Education-Iloilo may kaangtanan sa natabo nga kinagamo sa hampang sa baseball sa nagapadayon nga Iloilo Schools Sports Council Meet 2019.
Nahibalu-an nga nakasumpong sang Anilao ang Barotac Viejo National High School nga nagatiglawas sang 5th district.
Sa exclusive interview sang Bombo Radyo kay Mr. Nicasio Valenzuela, Division Sports Officer sang Department of Education-Iloilo, iya ginpahayag nga matapos ang insidente, gilayon nga nagpadala sang sulat si Mark Kynn Aquilesca, coach sang Fourth District Baseball Secondary kay Schools Division Superintendent. Dr. Roel F. Bermejo.
Diri ginhingyo nga indi na mag-upod sa ila hampang ang tatlo ka technical officials nga ila nakaaway sa diin may buyayaway pa nga natabo.
Nahibaluan nga sa nasambit nga hampang, ginhingyo sang Tournament Manager nga mag-concede na ang 4th district matapos malutos sa 5th district sa score nga 6-0.
Nagpasugot na ang coach sang 4th district sa pagpirma sa dokumento apang sa ulihi, nakibot na ang lang technical officials nga nag walk out na ang mga player sang Anilao.
Suno kay Valenzuela, sa subong wala sila sang guidelines sa paghatag sang sanction ukon pagpina sa kaangay nga mga insidente.
Sa pihak sini, ginpromisa ni Valenzuela nga himuon nila ini nga basehan sa paghimu sang pagsulundan sa pagpina sa coaches kag players nga nagapang-away kag nagapamuyayaw sa technical officials.
