ILOILO CITY – Nagakadapat nga ipalapnag sang maayo ang ipatuman nga signal shutdown kadungan sang Dinagyang Festival 2020.
Ini ang kasunod sang hingyo sang Iloilo City Police Office nga dapat may yara sang signal shutdown para sa seguridad sang kadam-an.
Sa interview sang Bombo Radyo kay Ms. Lea Lara, Executive Director sang Iloilo Business Club, iya ginpahayag nga antes pa man ang Dinagyang Festival 2020, nagakadapat nga may yara sang information dessimination agud nga indi na makibot ang tanan pag-abot sang Enero 25 tubtub 26, umpisa 6:00 sa aga tubtub 2:00 sa hapon.
Suno kay Lara, may yara sang epekto sa business sector ang igapatuman nga signal shutdown ilabi na ang trasaction nga nagakinahanglan sang communication kag internet signal.
Ginpahayag ni Lara nga magluwas sa business sector, apektado man ang mga dumuluong nga wala nakahibalo nga may yara sang signal shutdown.
Sa pihak sini, ginpahayag sang natungdan nga ang signal shutdown ang para man sa kaayuhan sang kadam-an gani, wala nagapamalabag ang Iloilo Business Club.
