ILOILO CITY – Ginapapasa sang report kag contingency plan ang tagsa ka Disaster Risk Reduction and Management Office sa Western Visayas kasunod sang mabaskog nga linog sa Davao del Sur.
Sa interview sang Bombo Radyo kay Office of Civil Defense 6 Director Jose Roberto Nuñez, iya ginpahayag nga kinahanglan nga mahibalu-an ang numero sang volunteer kag equipment nga mahimo magamit para sa rescue operation sa tion nga mag-igo ang mabaskog nga linog sa rehiyon.
Wala man ginapangayo suno kay Nuñez apang indi imposible nga matabo man sa rehiyon ang natabo sa Mindanao sa diin madamu ang napatay klag madamu sang propidad ang naguba tuga sang linog.
Ginpahayag ni Nuñez nga kinahanglan man nga mapaidalom gilayon sa training ang mga volunteer bangud santo sa record, sang 2017 pa ang pinakaulihi nga training nga ginhatag sa mga volunteer.
Kun kinahanglan, magapadala ang Region 6 sang volunteer sa Davao del Sur agud nga magbulig sa rescue operation.
Magluwas diri, ginamandu-an man ang tagsa ka hotel owners kag operators lakip na ang nanari-sari nga stakeholders nga magpatigayon sang earthquake drill lakip man ang pagdihon sang contingency plan sang tagsa ka Municipal, Provincial ukon City Disaster Risk Reduction and Management Office bilang pagpanghanda.
Ginpromisa sang natungdan nga tubtub siya ang Regional Director sang Office of Civil Defense 6, iya himuon ang tanan agud nga matuman ang zero casualty sa tion sang kalamidad.
