ILOILO CITY – Ginakalipay sang mga pumuluyo sang Brgy. Ortiz, Iloilo City nga ginbalik sa Ortiz wharf ang dulungkaan sang pump boat nga may ruta Jordan-Iloilo vice versa umpisa buwas nga adlaw.
Ini matapos ang pila ka bulan nga pagpasirado sa nasambit nga pantalan agud nga hatagan sang ligwa ang rehabilitasyon.
Sa interview sang Bombo Radyo kay Barangay Kagawad Teresa Yu, iya ginpahayag nga mabalik na sa kinaandan ang palangabuhi-an sang mga pumuluyo sa ila lugar.
Suno kay Yu, mahimo nga may yara lang sang pagsalangisag sa tunga sang mga ahensya ahensya sang gobyerno rason nga naatrasar ang pagdungka sang mga pump boat sa nasambit nga pantalan.
Samtang, gin-ako naman ni Mr. Jeck Conlu, pinuno sang Public Safety and Transportation Management Office, nga may yara sang kakulangan sa komunikasyon sa tunga sang mga ahensya sang gobyerno.
Suno kay Conlu, sa pagkamatuod, ulihi na lang siya nakahibalo nga may yara na sang pronouncement nga ibalik sa Ortiz wharf ang dulungkaan sang pump boat nga may ruta nga Jordan-Iloilo vice versa.
Buwas nga adlaw suno kay Conlu, obserbahan anay kun bala ano ang mangin plastada agud nga masigurado nga wala sang huol nga matabo.
