ILOILO – 24 ka mga atleta gikan sa 5th district sa probinsya sang Iloilo ang nahatagan sang bulig ni Sen. Christopher “Bong” Go.
Ini matapos nga nag-viral sa social media ang isa ka runner nga nagasuksok sang improvised nga sapatos sa baylo nga spike shoes.
Sa interview sang Bombo Radyo kay Prederick Valenzuela, volunteer sa Iloilo Schools Sports Council Meet 2019, iya ginpahayag nga siya anay ang isa man ka atleta nga naghalin sa pigado nga pamilya.
Suno kay Valenzuela, natandog ang iya balatyagon sang nakita ang elementary athelete nga si Rhea Bullos nga nagasuksok lamang sang improvised nga sapatos agud lamang nga makadalagan.
Ginpahayag ni Valenzuela nga wala niya ginhuna-huna nga mag-viral ang iya post tuhoy kay Bullos kag madamo man ang nagpadala sa iya sang mensahe nga magahatag sang bulig sa atleta.
