ILOILO CITY – Daku nga pagpanghangkat para sa Public Safety and Transportation Management Office ang pagpatuman sang traffic regulation ilabi na sa tion sang kagab-ihon.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga kalabanan sa mga aksidente ang nagakatabo sa tion sang tungang gab-i kag kaagahon nga wala sang may nagabantay nga traffic auxiliary ukon personnel.
Suno kay Conlu, sa subong, duha lang ka shifting ang nagabantay sa mga dalanon sa palibot sang syudad apang kun iduso ang 24-hour shifting, kinahanglan nga dugangan ang traffic personnel.
Ginpahayag ni Conlu nga umpisa sa masunod nga tuig, hugot nga ipatuman ang Traffic Discipline Zone sa Sen. Benigno Aquino Jr. Avenue ukon Diversion Road sa distrito sang Mandurriao sa diin madamu sang aksidente ang nagakatabo.
Kun basehan ang data tuhoy sa mga nagakatabo nga traffic accident sa bulan lang sang Disyembre, nagalab-ot sa 603 ang na record sang 2016, 456 sa 2017, 673 sang 2018 kag subong nga tuig humalin Disyembre 1 tubtub 15, nagalab-ot sa 287 ang traffic accident.
Maga-umpisa naman ang pagpangbutang sang traffic signs sa Diversion Road kag isa-isahon ang mga bar kag commercial establishment agud nga mapahibalo ang tuhoy sa nasambit nga kampanya.
