ILOILO CITY – Naglab-ot sa 53 ka empleyado sang Iloilo City Hall ang ginpa-recall sang Civil Service Commission matapos nakitaan sang discrepancy sa proseso sang appointment kag promotion.
Santo sa notice of decision nga ginpaguwa sang Civil Service Commission, kalabanan sa mga appointment ang natigayon apisar nga wala sang quorum ang Human Resource Merit Promotion and Selection Board.
Sa interview sang Bombo Radyo kay Iloilo City Mayor Jerry Treñas, iya ginpahayag nga magluwas sa 53 ka empleyado, may yara pa sang dugang nga 23 ang ginapaidalom sa review.
Kun matigayon suno kay Treñas, magalab-ot sa 76 ang kabug-usan nga empleyado nga gin-appoint sa termino ni anay Iloilo City Mayor Jose Espinosa III nga wala nag-agi sa nagakaigo nga proseso.
Ginpahayag ni Treñas nga ang appointment kag promotion ang natabo sang Disyembre 2018 tubtub Marso 27 subong nga tuig.
Sa subong suno sa alkalde, ang tanan nga gin-promote ang magabalik sa ila kinaandan nga posisyon samtang makabig naman nga null and void ukon wala sang pulos ang appointment sa nasambit nga duration period.
