ILOILO CITY – Magahimo pa sang committee report si Iloilo City Counilor Jojo Javellana, chairman sang Committee on Police Matters, may kaangtanan sa pagdeklarar sa New People’s Army nga persona non grata.
Ini ang kasunod sang committee hearing nga ginpatigayon may kaangtanan sa proposal ni Iloilo City Police Office Director Police Col. Martin Defensor Jr. nga dapat ideklarar nga persona non grata ang rebelde nga grupo.
Sa interview sang Bombo Radyo kay Javellana, iya ginpahayag nga magapatigayon pa sila sang ika duha nga committee hearing sa masunod nga tuig apang sa subong, iya anay nga pagatutukan ang paghimo sang committee report.
Suno kay Javellana, maayo ang katuyu-an sang nasambit nga proposal apang kinahanglan man nga tun-an antes ini ipasar.
Ginpahayag ni Javellana nga santo sa assessment, indi lapnagon ang terrorist activities sa Iloilo magluwas sa hublag protesta.
Samtang, kun tuhoy naman sa ginaduso nga signal shutdown sa Dinagyang Festival 2020, ginpahayag ni Javellana nga mas makapaayo kun may yara lamang sang schedule nga sundon agud nga indi man huol para sa publiko.
Suno sa konsehal, sa baylo nga bilog nga adlaw, kuntani may yara lang sang gintalana nga oras sa pagpatuman sang signal shutdown.
Ginpahayag man sang natungdan nga indi lamang ang mga tumalan-aw ang mabudlayan sa tion nga may signal shutdown kun maapektuhan man ang media nga maga-cover sang kahiwatan.
