MALAYSIA – Madamo sang rason agud nga magkalipay, magpasalamat kag mag-angkon sang paglaum subong nga paskwa sa pihak sang problema.
Sa Good Morning Philippines program, ginpahayag ni Jenelyn Yanson, Overseas Filipino Worker sa Malaysia, nga mabudlay para sa iya nga mapalayo sa iya kabataan ilabi pa nga napreso ang iya bana.
Suno kay Yanson, iya gid nga ginkakibot ang balita nga illegal drugs kag paghupot sang loose firearms ang rason kun nga-a gindakop ang iya bana.
Ginpahayag ni Yanson nga bilang isa ka iloy kag Overseas Filipino Worker, mabudlay para sa iya nga makita nga wala sang ginikanan ang iya kabataan.
Sang 2017, ginpahayag sang natungdan nga ginsentensyahan sang anum ka bulan tubtub 10 ka tuig nga pagkabilanggo ang iya bana.
Indi man malikawan suno sa natungdan nga kun kaisa nagakadulaan siya sang paglaum sa kabuhi apang iya lang nga ginapanumdum ang iya pamilya.
Sa pihak sini, nagapasalamat naman si Yanson bangud nga mabuot ang iya employer kag sa pagkamatuod, ginpahanugutan siya nga magpadulong sa Singapore agud nga magsaulog sang Christmas kaupod ang iya duha ka utod nga Overseas Filipino Worker.
Ang importante suno kay Yanson amo nga dapat hibaluon ang matuod nga rason sang kabuhi sa kalibutan kag dapat nga updan ini sang pagpangamuyo.
Subong nga Paskwa, ang handum lang sang Ilongga OFW amo ang kaayuhan para sa iya pamilya.
