ILOILO CITY – Todo ang kampanya sang Iloilo City Mobile Force Company may kaangtanan sa pagpatuman sang Project BLAST ukon Building a Link for Community to Achieve the Safety and Trust.
Sa Good Morning Philippines program, ginpahayag ni Police Executive Master Sergeant Leo Angelo Castro sang Iloilo City Mobile Force Company, nga ang Project BLAST ang may katuyu-an nga engganyuhon ang publiko nga indi maghupot sang granada kag iban pa nga sahi sang explosives nga mahimo makatuga sang halit.
Suno kay Castro, sa nasambit nga programa, sa tagsa ka granada, may yara sang mabaton nga P1,000 ang nag turn-over apang ang nasambit nga proyekto ang applicable lamang sa mga pumuluyo sang syudad sang Iloilo.
Ginpahayag ni Castro nga ang paghupot sang granada ang wala ginapanugyan bangud nga sa tion nga may yara sang sunog, mahimo ini nga maglupok kag makatuga sang madamu nga kahalitan.
Santo sa layi, ang madakpan nga nagahupot sini ang mahimo nga pasakaan sang kaso kag kun mapamatud-an nga guilty, reclusion perpetua ang silot.
Samtang, sa tion sang disposal, ginpahayag ni Police Senior Master Sergeant Steven Salaya nga ginalubong sa duta ang mga granada antes palukpon.
Suno kay Salaya, kinahanglan nga tuman ka dalom ang buho agud nga masigurado nga indi mag-agsik ang shrapnel.
May yara sang ginasunod nga sequence ang pagbutang sang daan nga granada kag sa babaw sini amo ang mga bag-o nga explosives antes tabunan sang duta kag palukpon.
Ang lugar ang dapat nga maligwin kag kinahanglan nga masigurado nga wala sang tawo ukon sapat sa palibot.
