ILOILO CITY – Kanselado ang biyahe sang fast craft kag RORO vessel nga may ruta Iloilo-Bacolod vice versa.
Ini matapos nga ginpaidalom sa storm warning signal 1 ang Iloilo bangud sa bagyo Ursula.
Sa interview sang Bombo Radyo kay Captain Erlinda Benliro, station commander sang Philippine Coast Guard Iloilo, iya ginpahayag nga umpisa 5:50 kaina sang kasisidmon, ginpauntat na ang biyahe sang mga sakayan nga may ruta Iloilo-Bacolod vice versa.
Suno kay Benliro, sakop sang untat-biyahe ang mga fastcraft kag RORO vessel nga may ruta nga Dumangas-Bacolod vice versa.
Ginpahayag ni Benliro nga ang iban sa mga pasahero nga naapektuhan sang untat-biyahe ang nagpa refund na lang sang ticket.
Padayon naman ang biyahe sang pump boat kag fast craft nga may ruta Iloilo-Guimaras vice versa apang may yara sila sang ginasunod nga guidelines santo sa mandu sang Maritime Industry Authority.
Pahanugutan ang paglayag sang pump boat kun maayo lang ang tiyempo kag sunrise to sunset lamang ang biyahe.
May kaangtanan diri, madamo sang mga pasahero ang na-stranded sa mga pantalan.
