ILOILO CITY – May yara sang tatlo ka team nga gin-deploy ang Public Safety and Transportation Management Office agud nga magpangsaway sang mga sidewalk vendor nga nagakalit sa pagbaligya sa higad sang dalan.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga ginasaway gid sang PSTMO personnel ang mga manugbaligya nga yara na sa higad sang dalan nagapwesto.
Suno kay Conlu, kun kaisa, nagalab-ot pa sa paglinagsanay tubtub nga nagapakitlu-oy na lang ang manugbaligya agud nga indi pagdakpon.
Ginpahayag ni Conlu nga wala siya sang may mahimo kundi sundon ang Oplan Hawan bangud nga ini ang mandu ni Presidente Rodrigo Duterte.
Agud nga indi pagdakpon, ang modus sang mga vendor amo nga ila na lang nga ginabitbit ang ila balaligya.
Samtang, tuhoy naman sa pagpugok sang trapiko sa palibot sang syudad sang Iloilo, ginpahayag ni Conlu nga normal lamang ini ilabi na sa tion sang holiday rush.
Suno kay Conlu, isa man sa rason amo nga kaina sang hapon, halos dululungan ang nagluntad nga minor accident rason nga ginabaki-baki lang ang assignment sang traffic enforcers.
