ILOILO CITY – Magabakal ang Iloilo City Government sang Vacuum Sweeper Truck para sa pagpaninlo sa palibot sang syudad sang Iloilo.
Sa interview sang Bombo Radyo kay Engr. Neil Ravena, pinuno sang General Services Office – Solid Waste Management, iya ginpahayag nga ang acuum Sweeper Truck ang pagagamiton sa pagtinlo sa ginakabig nga deadliest road sa syudad nga amo ang Diversion Road sa distrito sang Mandurriao.
Suno kay Engr. Ravena, kaagahon pa lang, nagapaninlo na ang mga streetsweeper kag sa tion man sang kaagahon nagakatabo ang mga aksidente bangud nga wala sang traffic enforcer nga nagabantay.
Ginpahayag ni Engr. Ravena nga isa lang anay ka Vacuum Sweeper Truck ang pagabaklon agud nga mahibalu-an kun ini ang epektibo ukon indi.
Sa subong, gin-aprobahan na ni Iloilo City Mayor Jerry Treñas ang pagbakal sang nasambit nga equipment para man sa seguridad sang mga streetsweeper.
