ILOILO CITY – Nakadepende kay Iloilo City Mayor Jerry Treñas kun bala makabalik sa trabaho ang mga empleyado sang Iloilo City Hall nga ginpa-recall sang Civil Service Commission matapos nga wala nag-agi sa nagakaigo nga proseso ang ila appointment kag promotion.
Sa interview sang Bombo Radyo kay Atty. Edgar Gil, pinuno sang City Legal Office, iya ginpahayag nga ang alkalde ang makahatag sang pinal nga desisyon kun bala makabalik sa trabaho ang 53 ka empleyado kag dugang nga 23 ka mga empleyado nga sa subong, gina-imbestigaran pa sang Civil Service Commission.
Suno kay Atty. Gil, ang alkalde ang appointing authority kag amo man ang magadesisyon sa pagbaton sang mangin empleyado sang Iloilo City Hall.
Kun ano man ang mangin resulta sang due process, ginpahayag ni Atty. Gil nga mahimo pa man nga maka-apela sa Court of Appeals ang mga empleyado.
Samtang, suno naman kay Mayor Treñas, busisi-on pa niya ang background kag records sang mga empleyado antes magdesisyon.
Ginpahayag ni Mayor Treñas nga nagakinahanglan sang empleyado ang Iloilo City Government apang kinahanglan nga ang ginabaton nga aplikante ang nag-agi sa nagakaigo nga proseso kag kwalipikado para sa isa ka government position.
Ginpromisa naman sang alkalde nga iya ipatawag ang mga ginapa-recall nga empleyado agud nga pahibaluon kun ano ang ila madangatan.
