ILOILO – Naglab-ot sa P700,000 ang balor sang bulig nga nahatag sang Department of Social Welfare and Development para sa mga naapektuhan sang bagyo Ursula sa Western Visayas.
Sa interview sang Bombo Radyo kay May Castillo, information officer sang Department of Social Welfare and Development 6, iya ginpahayag nga antes pa man naglaslas ang bagyo, nakahanda na nga daan ang food packs nga ginalakipan sang bugas kag assorted canned goods.
Suno kay Castillo, magluwas sa food packs, may yara man sang cash assistance nga ginhatag ang ahensya kag ang mga Local Government Unit.
Ginpahayag ni Castillo nga pahat-pahaton sa mga pumuluyo sa Northern Iloilo ang 7,000 food packs.
Samtang, wala pa man natapos ang assessment sang Office of Civil Defense 6 sa halit nga tuga sang bagyo, may yara na sang rekomendasyon si Regional Director Jose Roberto Nuñez.
Suno kay Nuñez, mas maayo nga tutukan ang paagpasangkad sang water irrigation system kag ang flood control project sa Western Visayas ilabi na sa Capiz kag Iloilo agud nga malikawan ang pagbaha.
Sa pagkamatuod suno kay Nuñez, iya nga ginplastar sa pagsinapol sadto ang tuhoy sa Panay River Basin project nga ongoing pa tubtub subong.
