AJUY, ILOILO – Ginbawian na sang kabuhi ang 17 anyos nga solterito matapos nalumos sa Ginasian Island, Brgy. Malayu-an, Ajuy, Iloilo.
Ang biktima amo si alyas Ronel sang Brgy. Culasi, Ajuy, Iloilo.
Sa exclusive interview sang Bombo Radyo kay Pol. Capt. Roy Castro, hepe sang Ajuy Municipal Police Station, iya ginpahayag nga kaupod ni Ronel ang iya pamilya sa isla agud nga magpaligo.
Sang nagapaligo na ang biktima kaupod ang lima pa ka himata, hinali lang sila nga ginhampak sang mabaskog nga balod rason sang ila paglinapta sa dagat.
Suno kay Castro, nakasuksok ang duha sa mga himata sang life jacket samtang nagakupo sa ila ang duha pa ka mga kaupod.
Nakit-an na lamang si Ronel lima tubtob 10 ka minutos matapos ginhampak sang mabaskog nga balod kag gilayon nga gindala sa hospital apang ginbawian ini sang kabuhi.
