ILOILO CITY – Hatagan sang prayoridad ang mga empleyado sang Iloilo City Hall agud mangin benepisyaryo sang 120 medium rise condominium unit nga pagatukuron sa syudad sang Iloilo.
Ang nasambit nga condominum ang isa sa priority projects ni Iloilo City Mayor Jerry Treñas subong nga tuig.
Sa interview sang Bombo Radyo kay Treñas, iya ginpahayag nga may yara na sang lugar nga patindugan sang nasambit nga proyekto kag ginahulat na lang ang presentation ni Mr. Roy Firmeza, pinuno sang Iloilo City Urban Poor Affairs Office, agud mahibalu-an ang kabug-usan nga detalye.
Ginpahayag ni Treñas nga unahon sa pagahatagan ang permanent employees nga wala sang mga balay kag ginapasiguro niya nga wala sang palapit-lapit sa luwag agud nga makabaton ang mga deserving nga empleyado.
