ILOILO – Napirmahan na ni Iloilo Gov. Arthur Defensor Jr. ang resolusyon nga nagakadapat nga ipaidalom sa state of calamity ang mga banwa sa probinsya sang Iloilo nga naapektuhan sang Bagyo Ursula.
Sa interview sang Bombo Radyo kay Atty. Suzette Mamon, provincial administrator, iya ginpahayag nga ginatipon na ang tanan nga attachment agud nga mapasa na sa Sangguniang Panlalawigan ang nasambit nga resolusyon.
Suno kay Mamon, kinahanglan nga mahingagaw ang nasambit nga resolusyon sa mangin agenda sa sesyon sang Sanguniang Panlalawigan agud nga mahatagan gilayon sang dugang nga bulig ang mga naapektuhan sang bagyo.
Ginpahayag ni Mamon nga indi gid mahinago nga nagakinahanglan nga ipaidalom sa state of calamity ang pila ka mga banwa sa Northern Iloilo bangud nga nalab-ot ang 13% threshold damage.
May kaangtanan diri, 9 ka mga banwa ang nalakip sa igaduso nga ipaidalom sa state of calamity.
Sa interview sang Bombo Radyo kay Dr. Jerry Bionat, pinuno sang Provincial Disaster Risk Reduction and Management Office, iya ginpahayag nga ang banwa sang Barotac Viejo, Ajuy, Batad, Carles, Concepcion, Estancia kag San Dionisio ang nalakip sa resolusyon nga ginpirmahan sang gobernador.
Kun basehan ang halit sa palay, nagalab-ot sa 99% ang na record sa Barotac Viejo, 90% sa Ajuy, 64.9% sa Batad, 74.18% sa Balasan, 70% sa Carles,
75.97% sa Concepcion, 87.46% sa Estancia, 36% sa San Dionisio kag 45% sa Sara.
Wala naman nakahingagaw sa deadline ang Lemery samtang wala naman nagpasa sang damage report ang San Rafael.
