ILOILO CITY – Mas pasangkaron pa sang Bombo Radyo Philippines ang paghatag sang balita pinaagi sa digital platform.
Ini ang isa sa mga gindiskusyonan sa nagapadayon nga Top Level Management Conference sang Bombo Radyo Philippines sa syudad sang Iloilo, nga ginakabig nga seat of government sang network.
Ginpangunahan sang chairman emeritus sang Bombo Radyo Philippines nga si Dr. Rogelio M. Florete ang Top Level Management Conference.
Ang media mogul nga pila ka dekada nga nagpamuno sa Bombo Radyo Philippines ang nagpasa sang baton sa iya anak nga si Ms. Margaret Ruth C. Florete bilang Presidente kag Chief Executive Officer, nga nagpasigurado sa paghatag sang balita first, fast and accurate.
Sa iya nga State of the Network Address, ginpahayag ni Ms. Florete nga subong nga tuig, mas pabaskugon ang pagdul-ong sang husto nga balita santo sa tema nga “In Step with Digital Technology” sa diin hatagan sang importansya ang Facebook Live sang Bombo Radyo Philippines.
Suno kay Ms. Florete, mas ginpatahom pa ang pagbalita sa mga tagpalamati indi lang sa Pilipinas kundi mangin sa nagkalain-lain nga bahin sang kalibutan sa diin makit-an na ang mga nawong sa likod sang mga tingog sang tagsa ka programa agud mas maganyat ang advertisers nga ipakilala ang ila produkto bangud sa malapad nga sakop sang Bombo Radyo Philippines.
Ang St. Clement’s Retreat House ang venue para sa isa ka semana nga Top Level Management Conference sang Bombo Radyo Philippines agud ipakigbahin ang mga natun-an sang nakaligad nga tuig kag ang paglunsyar sang tinituyo sang network gamit ang machinery para sa serbisyo publiko pinaagi sa paghatag sang mga balita, impormasyon kag mga socio-cultural project nga nagahatag sang impact sa kabuhi sang mga Pilipino.
Ang Top Level Management Conference sang Bombo Radyo Philippines ang tuigan nga pagtililipon nga ginatambongan sang masobra sa 100 ka senior officers, area kag mga station managers, news directors kag chief technicians gikan sa 31 ka mga key cities sa pungsod.
