KUWAIT/ UAE – Naga-aligmat ang mga Overseas Filipino Worker sa Middle East sa posible matabo sa tunga sang Iran kag Estados Unidos.
Sa interview sang Bombo Radyo kay Analina Escalona sang Igbaras, Iloilo kag OFW sa Kuwait, iya ginpahayag nga sa apisar kalmado ang sitwasyon apang indi mapaktan ang mahimo nga matabo bangud sa nagataas nga tensyon sa tunga sang duha ka pungsod.
Suno kay Escalona, kadam-an sa mga OFW ang nakahanda naman nga magpauli apang may iban naman nga nagapang alang-alang bangud sa pila ka sirkumstansya.
Ginpahayag ni Escalona nga nakahanda siya nga magpauli sa Pilipinas kun kinahanglanon kag pabor man siya nga ang mga apektado nga OFW sa Middle East ang pagahatagan sang trabaho sa iban nga pungsod.
Samtang, gin-athag naman ni Jhem Tan, OFW sa Dubai, nga fake news ang tuhoy sa paandam sang Iran nga bombahon ang Israel kag Dubai sa tion nga magbalos ang Estados Unidos.
Suno kay Tan, indi matuod ang nasambit nga balita kag nagatuga lamang ini sang kakugmat sa publiko.
Ginpahayag ni Tan nga mismo ang mga opisyal sang Dubai ang nagkumpirma nga indi matuod ang tuhoy diri bangud nga wala sang tensyon sa tunga sang Dubai kag Iran.
Sa subong, ginpahayag sang natungdan nga wala nagakulang ang gobyerno sa paghatag sang abiso sa mga OFW.
