ILOILO CITY – Hugot nga seguridad ang ipatuman sang Iloilo City Police Office may kaangtanan sa nagahilapit nga Dinagyang Festival 2020.
Sa interview sang Bombo Radyo kay Iloilo City Police Office Spokesperson Police Captain Shella Mae Sangrines, iya ginpahayag nga bangud nga sa Enero 26 lang ang signal shutdown, lauman nga may yara sang dugang nga security measures nga patigayunon ilabi na kun magsulod sa tagsa ka judging areas.
Suno kay Sangrines, rikisahon ang tanan nga nagasulod kag lantawon man ang unod nga bag agud nga masiguro nga wala sang hinganiban ukon armas luthang nga makalusot.
Ginpahayag ni Sangrines nga sa highlight sang kahiwatan, lauman ang pagdagsa sang tawo nga maluyag magsaksi sa world class performance sang tagsa ka tribu.
Nagalaum naman ang natungdan nga wala sang may matabo nga krimen sa Enero 25-26 kasubong sa Opening Salvo nga ginpatigayon kahapon sang hapon.
