ILOILO CITY – Magapatigayon sang pagsinapol ang Iloilo Festivals Foundation Inc. sa Martes, Enero 14, agud istoryahan ang assessment sa ginpatigayon nga Opening Salvo sang Dinagyang Festival 2020.
Sa interview sang Bombo Radyo kay Atty. Joebert Peñaflorida, presidente sang Iloilo Festivals Foundation Inc., iya ginpahayag nga ipatawag ang tanan nga komitiba agud mahibalu-an kun ano ang dapat nga bag-uhon sa pagpatigayon sang Dinagyang Festival.
Suno kay Peñaflorida, daku nga pagpanghangkat para sa Iloilo Festivals Foundation Inc. ang pagdumala sa mga mayor nga selebrasyon sa syudad sang Iloilo apang ila man nga ginatinguhaan nga makahatag sang maayo nga serbisyo.
Ginpahayag ni Peñaflorida nga kadungan sang pagpatigayon sang kahiwatan, kun tani, indi man pagkalimtan ang pagtipig sang dunang manggad ilabi na nga magabaton sang international award ang Iloilo City Government sa masunod nga semana kun katinlo sa palibot ang pagahambalan.
May kaangtanan sa ginpatigayon nga Opening Salvo kahapon, ginpahayag sang natungdan nga iya gid nga ginapasalamatan ang pagpanikasog sang tanan nga tribu nga tuman gid nga naghanda agud ipakita ang world class performance.
