ILOILO CITY – Ginpapanaugan sang 59-day suspension ang tatlo ka mga pulis nga nagmaoy sa isa ka club sa JM Basa St., Iloilo City.
Sa interview sang Bombo Radyo kay Police Brigadier General Rene Pamuspusan, Regional Director sang Police Regional Office 6, iya ginpahayag nga ginpiramahan niya ang desisyon sang nagligad nga Disyembre 30, 2019 matapos nga nakitaan nga probable cuase sanday Police Chief Master Sergeant Jose Dingal, Police Master Sergeant Fernie Mark Mallorca kag Police Staff Sergeant Ralph Mabuque sa kaso nga Less Grave Neglect of Duty.
Ginpahayag ni Pamuspusan nga light offense lang ang nahimo sang tatlo ka mga pulis rason nga 59-day suspension lang ang ginsilot sa ila.
Sa 59 ka adlaw, wala sang may mabaton nga sweldo kag iban pa nga benepisyo sanday Dingal, Mallorca kag Mabuque.
Sa subong, indi pa mapat-od kun ano ang madangatan sang career sang tatlo ka pulis.
Kun madumduman, Hunyo 26 sang nakaligad nga tuig sang ginreklamo ang tatlo ka pulis nga nag-maoy sa isa ka club matapos ginsukot sang bill.
Nauna na nga ginpanginwala sang tatlo ka pulis ang alegasyon batok sa ila.
