ILOILO CITY – Nagtaasay sang tingog sanday Iloilo City Councilor Jojo Javellana kag Iloilo City Councilor Eduardo Peñaredondo kadungan sang regular session kaina sang aga.
Ini matapos nga ginplastar ni Javellana ang tuhoy sa iya ginaduso nga adaptation sang Republic Act 7183 ukon Regulation and Control of Firecrackers and other Pyrotechnics nga mangin ordinansa sa syudad sang Iloilo.
Nagsuhestyon si Peñaredondo nga dapat tun-an ni Javellana ukon mag-hire sang law expert nga staff agud nga mahangpan ang kaundan sang ginaduso nga ordinansa.
Mas maayo suno kay Peñaredondo nga magbalay na lang sang bag-o nga ordinansa sa baylo nga adaptation lang ang pagahimuon.
Bangud sini, nagbayluhanay sang pahayag ang duha ka konsehal.
May kaangtanan diri, ginpanindugan ni Peñaredondo nga wala sang lamud pamersonal ang iya nangin pahayag.
Sa interview sang Bombo Radyo kay Peñaredondo, iya ginpahayag nga bilang senior sa Iloilo City Council, katungdanan niya nga tudlu-an ukon panugyanan ang mga kaupod nga konsehal kun ano ang mas makapaayo.
Suno kay Peñaredondo, ang iya ginhimu ang trabaho lang bangud nga mag-abyanay man sila ni Javellana.
Matapos ang pagsabtanay, nagpangayo sang pasaylo si Javellana sa iya nangin pahayag kadungan sang sesyon.
Sa interview sang Bombo Radyo kay Javellana, iya ginpahayag nga iya ginhinulsulan ang pagtaas sang iya tingog kay Peñaredondo nga ginakabig niya nga Tito Ed.
Suno kay Javellana, mahimo nga nadala lang siya sa emosyon matapos ang ginbuy-an nga pahayag ni Peñaredondo.
Kadungan sini, ginpaahayag sang natungdan nga wala siya sang kalain sang buot bangud nga normal lamang magbinaisay sa sesyon.
