ILOILO CITY – Gindula ni Iloilo City Mayor Jerry Treñas ang kahangawa sang mga pumuluyo sa syudad sang Iloilo sa posible gamay lang ang magabisita sa syudad kadungan sang Dinagyang 2020 bangud sa nagapadayon nga ash fall sa pila ka bahin sang Luzon.
Sa interview sang Bombo Radyo kay Mayor Treñas, iya ginpahayag nga wala sang nagakadapat nga kabalak-an ang mga pumuluyo sa syudad bangud base sa ginpasa sa iya nga mga reports sang mga hotel sa syudad, fully booked na ang pipila sa mga hotel sa sulod sang apat ka adlaw umpisa Enero 24 tubtob Enero 27.
Suno kay Treñas, padayon ang preparasyon sang syudad para sa Dinagyang 2020.
Nagapati ang alkalde nga indi maapektuhan ang kadamuon sang tawo nga magselebrar sang Dinagyang bangud sa numero pa lamang sang mga pumuluyo sa syudad kag probinsya sang Iloilo, mapuno gid ang mga dalanon.
Pahayag ni Treñas, kumpirmado naman nga magabisita ang mga ambassador sa nagkalain-lain nga pungsod sa syudad sang Iloilo kadungan sang Dinagyang.
Dugang pa sang natungdan, apisar nga magaselebrar sang Dinagyang ang bug-os nga syudad, nagpangabay ini sa mga pumuluyo sang Iloilo nga mag-isa sa pagpangamuyo sa safety sang mga tawo sa Batangas.
