STA. BARBARA, ILOILO – Nagamato-mato na lang sa pagpatigayon sang Committee Hearing ang Local Government Unit sang Pavia, Iloilo agud nga maka-angkon sang traffic scheme kadungan sang pag-umpisa sang pagtukod sang Ungka II flyover.
Sa interview sang Bombo Radyo kay SB Member Pyt Trimañez, chairman sang Committee on Transportation, iya ginpahayag nga sa subong, wala pa sang may nabalay nga traffic scheme agud kun tani nga indi magpugok ang trapiko sa area kun sa diin ginatukod ang nasambit nga proyekto.
Suno kay Trimañez, kulang sa coordination ang mga ahensya sang gobyerno ilabi na ang Department of Public Works and Highways kun sa diin mismo ang Sangguniang Panlalawigan ang wala man nakahibalo nga nag-umpisa na ang pagtukod sang flyover.
Ginpahayag ni Trimañez nga sa ila ginpatigayon nga Committee Hearing in Aid of Legislation, wala nakatambong si Public Safety and Transportation Management Office Head Mr. Jeck Conlu bangud nga nagdungan ini sa una nga adlaw sang pagpatuman sang Traffic Discipline Zone kag wala man sang may nagtambong nga tiglawas gikan sa Department of Public Works and Highways.
Mas makapaayo kun tani suno sa natungdan kun may yara na sang ginkasugtan nga traffic scheme agud nga matun-an kun bala kinahanglan pa nga magpasar sang ordinansa ukon indi.
