SAN JOAQUIN, ILOILO – Ginakabig ni Iloilo 1st District Board Member Marcelo Valentine Serag nga pinakamasubo nga Pasungay Festival ang nasaksihan subong nga tuig.
Ini ang kasunod sang pag-anunsyo ni San Joaquin, Iloilo Mayor Ninfa Garin nga indi na madayon ang Pasungay bangud sa pagkwestyon sang mga Animal Rights Advocate.
Sa interview sang Bombo Radyo kay Serag, iya ginpahayag nga ang Pasungay ang isa sa highlights sang festival nga ginapatigayon sa sulod na sang masobra isa ka siglo.
Suno kay Serag, wala nagkulang ang Local Government Unit sang San Joaquin agud kun tani nga madayon ang Pasungay apang nagdesisyon na lang si Mayor Garin nga indi ini pagdayunon para sa kalinungan sang mga nagakwestyon.
Ginpahayag ni Serag nga sa subong nga festival, gindayon ang iban nga aktibidad may kaangtanan sa Pasungay festival apang indi kasubong sa kinaandan nga nagadugok ang bisita agud magsaksi sa Pasungay.
Sa pihak sini, liwat naman nga ginpanindugan sang natungdan nga indi sahi sang animal cruelty ang Pasungay bangud nga ini ang pagdumdom kun daw ano ka importante ang sapat nga karbaw.
Sa kadugayon nga ginapatigayon ang Pasungay, ginpahayag ni Serag nga wala sang may napatay nga karbaw bangud sa nasambit nga aktibidad.
