ILOILO CITY – Masako na ang imahe ni Senior Sto. Niño sa paglibot sa syudad sang Iloilo samtang nagahilapit ang Dinagyang Festival 2020.
Kahapon nga adlaw, nag umpisa sa paglibot ang imahe ni Senior Sto. Niño sa mga ospital sa syudad sang Iloilo kag (Enero 21) las-3 sang hapon magabisita man ini sa Plazuela Dos.
Sa interview sang Bombo Radyo kay Fr. Reymund Edsel Alcayaga, kura paruko sang San Jose Placer, iya ginpahayag nga sa Enero 24, byernes nga adlaw, maga umpisa ang fluvial procession alas-3 sang hapon sa Fort San Pedro.
Suno kay Alcayaga, matapos ang fluvial procession, may misa kag blessing nga patigayunon sa San Jose Placer.
Takna alas 7 sang gab-i, may yara naman sang solemn foot procession sa diin mabatian live sa Bombo Radyo Iloilo ang holy rosary nga amo ang ginapamatian sang mga deboto nga naga upod sa prusisyon.
Wala naman sang mga drum ukon instrumento nga gamiton samtang naga prusisyon kundi lunsay pagpangadi lamang.
Pagkatapos sang solemn foot procession, may patigayunon man nga religious sadsad.
