ILOILO CITY – Balantayan ang grand coronation night sang mga matahom nga mga kanidata sang Miss Iloilo 2020 sa Enero 23, 2020 sa West Visayas State University, Cultural Center, alas-7 sang gab-i.
Ginpasiguro nanday Ms. Sarah O. Peña, Chairman sang Miss Iloilo 2020; Beverly Pangging Rosales , Co-chair sang Miss Iloilo 2020 kag Kevin Pison Piamonte, Creative Director sang Miss Iloilo 2020 nga mangin “content-driven” ang labing una nga pagpatigayon sang Miss Iloilo 2020.
Sa interview sang Bombo Radyo kay Piamonte, iya ginpahayag nga lauman nga mangin indi tuman kalawig ang pageant kaangay sang mga ginahiwat nga international pageants.
Suno sa iya, bangud nga ini ang labing una nga Miss Iloilo 2020, igapakita sa sini nga pageant ang Ilonggo Heritage agud nga ma-promote ang Iloilo sa global community.
Pahayag niya, may yara sang tatlo ka mga titulo nga pagaagawan ang mga kandidata lakip na diri ang Miss Iloilo World, Miss Iloilo Binibini kag Miss Iloilo Universe.
Kun sin-o man ang makakuha sang mga nasambit nga titulo ang pagasuportahan sang Iloilo City Government kag mangin official screening candidate nga magatiglawas sang Iloilo.
Sa bahin naman sang preparasyon, kumpiyansa ang komitiba nga 101% na nga handa ang Miss Iloilo 2020 para sa Enero 23.
Suno kay Rosales, nakahanda na ang tanan ilabi na ang mga guests ukon mga hurado nga “ready to fly” na sa syudad sang Iloilo agud saksihan ang ginapabugal nga Miss Iloilo 2020.
Dugang pa niya, si Mr. Robi Domingo ang mangin emcee sa grand coronation night.
Gindayaw man sini ang pito ka mga hurado sa Miss Iloilo 2020 nga wala na niya ginhingadlan bangud isa ini sa mga sorpresa sang komitiba para sa mga tumalan-aw.
Apang pahayag niya, sa pito ka mga hurado, may yara sang duha nga nagikan sa Binibining Pilipinas kag isa naman ang nagikan sa Miss Universe.
Samtang nagpasalamat naman si Peña kay Iloilo City Mayor Jerry Treñas kag sa Iloilo Festivals Foundation Inc. sa pagsalig sa iya nga kaptan ang labing una nga Miss Iloilo 2020.
Suno sa chairman sang Miss Iloilo 2020, gintaya nila nga tatlo ang ila mga pangalan sa patag sang pageantry gani ila gid ginhatag ang ila kapasidad kag abilidad sa paghitso sang tanan nga kinahanglanon agud mangin matahom kag enggrande ang Miss Iloilo 2020.
Indi man mag-huo ang duha niya ka mga kaupod subong nga sanday Rosales kag Piamonte kun indi nila kilala ang nagpamuno sa nasambit nga komitiba bangud para kay Peña, mas mahapos magtrabaho kun kabisado kag kilala niyo na ang isa kag isa.
Nagpasalig man ang tatlo nga wala sang “lull moments” nga matabo sa diin lauman nga pagpatak sang alas-7 sang gab-i sa Enero 23, maga umpisa gilayon ang pageant.
Ang West Visayas State University Cultural Center ang magabukas alas-6 sang gab-i agud nga maka amat-amat na sulod ang mga tumalan-aw.
Para naman sa mga indi makasulod sa venue, may yara sang LED screen nga ipahamtang saguwa sang cultural center kag may mga pulungkuan man agud nga makatan-aw apisar nga wala ikaw sa sulod sang venue.
