ILOILO CITY – Hugot nga ginpanindugan sang pamilya Muller nga indi durugista ang ila himata nga ginluthang-patay sa Brgy. Cuartero, Jaro, Iloilo City.
Sa exclusive interview sang Bombo Radyo kay alyas Jam, tiayon sang biktima nga si Alain Muller, 42, iya ginpahayag nga indi matuod nga nagahimo sang malain ang iya bana.
Suno kay Jam, siya mismo lakip na ang mga nakakilala sa iya bana ang makapamatuod sa iya pahayag.
Ginpahayag ni Jam nga laka lang nagalagaw kag nagagamit sang cellphone ang iya bana nga amo ang naga-atipan sa ila kamagulangan nga bata nga naga-edad sang anum ka tuig.
Matuod nga ginpatawag sadto sang mga Barangay Official sa ila lugar ang iya bana kag sa pagkamatuod, ila gin-athag sa otoridad nga indi matuod nga naangot sa illegal drugs si Alain kag ang utod nga si Mark.
Bisan ang mga Barangay Official ang makapamatuod nga wala naulamid sa anu man nga sahi sang gamo ang pamilya Muller.
