ILOILO CITY – Nalangkag na ang mga foreign photographer nga magsaksi sa Dinagyang Festival 2020.
Nagbisita mismo sa istasyon sang Bombo Radyo ang foreign photographers halin sa Indonesia, Turkey kag Thailand kaupod ang local photographers gikan sa Iloilo United Photographers and Panay Digital Shooters.
Suno kay Eldred Neal Sollesta, miyembro sang Iloilo United Photographers and Panay Digital Shooters, katuyu-an sang pag-imbitar sa mga foreign photographers amo nga mapakita sa mga dumuluong kun ano ang pagsaulog sang Dinagyang Festival nga nagapakita sang kultura sang mga Ilonggo.
Ginpahayag ni Sollesta nga paagi sa pagsaksi sang foreign photographers, ila mahangpan kun ano ang Dinagyang Festival nga ila man mapaambit sa ila mga kakilala sa tion nga makapauli sa tagsa nila ka mga lugar.
Magluwas diri, ginpahayag sang natungdan nga luyag man niya nga imbitaron man sila sang foreign photographers agud nga magsaksi sang ila kaugalingon nga aktibidad agud nga mapahangop man sa mga Ilonggo ang kultura sang iban nga pungsod.
Samtang suno naman kay Agatha Anne Bunanta, director sang Art Photography of Indonesia, makabig nga gamhanan ang laragway.
Bilang isa ka photographer, ginpahayag ni Bunanta nga sa bulig sang social media, mahangpan sang netizens kun ano ang kahulugan sang Dinagyang Festival kag kun nga-a ginapatigayon ang nasambit nga aktibidad.
Gindayaw man ni Bunanta ang katahum sang syudad sang Iloilo kag ang pagkamaabi-abihon sang mga Ilonggo.
