ILOILO CITY – Ginpasalig ni Sen. Franklin Drilon nga mabawi sang syudad sang Iloilo ang titulo nga Queen City of the South.
Sa nangin mensahe ni Drilon kadungan sang highlight sang Dinagyang Festival 2020, iya ginpahayag nga nagakadapat lamang nga ang syudad sang Iloilo ang kilalahon nga Queen City of the South bangud nga madamo na ang pagbag-o nga ginpatuman.
Lakip sa mga ginplastar ni Drilon amo ang pagtinlo sa Iloilo River, pagpahamtang sang Iloilo Esplanade, pagtukod sang Iloilo Convention Center kag may ginalauman pa nga mga proyekto nga matapos sa masunod nga tuig kasubong sang Ungka II flyover kag ang Jalaur Mega Dam nga ginalauman nga matapos sa 2022.
Bilang Ilonggo, ginpahayag ni Drilon nga bugalon siya sa pagkilala nga naangkon sang syudad sang Iloilo.
Magluwas sa mga infrastructure projects nga nagdala sang kaayuhan sa ekonomiya sang syudad, gindayaw man sang Senador ang Iloilo Festivals Foundation Inc. bangud sa pagpatigayon sang Dinagyang Festival nga may 360 degrees performance.
