ILOILO CITY – Magatutok sa massive information dissemination ang Iloilo City Government agud nga indi maglapta sa syudad kag probinsya sang Iloilo ang Novel Coronavirus nga halin sa Wuhan, China.
Ini ang nakita nga pagpanghanda ni Mayor Jerry Treñas may kaangtanan sa nasambit nga health scare kun sa diin nagsaka na sa kapin 80 ang patay.
Sa interview sang Bombo Radyo kay Treñas, iya ginpahayag nga santo sa iya pagpanalawsaw, madali nga matapikan sang nasambit nga balati-an ang mga bata, tigulang kag ang mga may yara na nga daan sang balati-an.
Suno kay Treñas, magapakig-angot na siya sa Iloilo Provincial Government kag sa Department of Health kun ano ang makapaayo nga himuon agud nga matapna ang paglapta sang Novel Coronavirus.
Lakip sa mga ginpanugyan ni Treñas amo nga dapat limpyo ang pagginawi, maghugas kag mag disinfect sang kamot ilabi na kun naghalin sa pampubliko nga lugar, maggamit sang face mask kag likawan ang pagpalapit sa mga tawo nga may yara sang balati-an.
Bangud sini, gin-anunsyo sang alkalde nga nagapangita ang Iloilo City Government sang 15 ka doktor nga iga-assign sa nagakalin-lain nga health centers sa syudad kag isa ka doktor nga magaserbe nga focal person nga amo ang magpangahop sa tion nga may yara sang health scare.
