ILOILO CITY – Mahimo na nga maka-apply sang promotion ang mga overweight nga pulis.
Ini ang gin-athag ni Philippine National Police Chief Police Director Gen. Archie Gamboa kadungan sang iya nga pagpadulong sa syudad sang Iloilo para sa Dinagyang 2020 Awarding and Closing ceremony.
Sa interview sang Bombo Radyo kay Gamboa, iya ginpahayag nga ang mga overweight nga pulis ang mahimo nga maka-apply sang promotion apang siguraduhon lang nga pagkatapos sang training kag schooling, yara na sa normal ang Body Mass Index.
Suno kay Gamboa, katuyu-an sang nasambit nga lihok ang para man sa kaayuhan sang mga pulis agud nga mapahilayo sa balati-an.
Ginpahayag ni Gamboa nga sa iya naobserbahan, 5 tubtub 6 ka tuig matapos ang pagretiro, masami nga nagabalati-an ang isa ka pulis kag kun kaisa nagaresulta pa ini sa kamatayon bangud sa tuman nga katambukon.
Kinahanglan suno sa PNP Chief nga mag-enjoy ang mga pulis sa ila retirement paagi sa pagpadayon sang helthy lifestyle.
Nauna nga ginpahayag sang natungdan nga indi maka-apply sang promotion ang mga pulis nga overweight kag obese.
Santo sa mga eksperto, makabig nga underweight ang mga may yara sang Body Mass Index nga manubo sa 18.5, normal naman ang may yara sang 18.5 tubtub 24.9, overweight naman ang may yara sang 25 tubtub 29.9 kag obese ang may Body Mass Index nga masobra sa 30.
Paagi sa metric system, ang Body Mass Index ang mahimo nga mahibalu-an paagi sa pag-divide sang weight in kilograms ukon bug-at sa height in meters squared ukon kataason.
