ILOILO CITY- Yara na subong sa maayo nga kahimtangan ang tatlo ka tuig nga bata nga lalaki nga gindala sa Western Visayas Medical Center matapos makitaan sang sintomas sang Coronavirus.
Ang biktima ang naghalin sa Guangdong Province sa China kaupod ang iya ginikanan kag nagpadulong sa Iloilo agud kuntani magtambong sa selebrasyon sang Chinese New Year.
Sa exclusive interview sang Bombo Radyo kay Dr. Mary Jane Juanico, pinuno sang Infectious Disease Section sang Department of Health Region 6, iya ginpahayag nga ang biktima ang nahilanat rason nga ginpa check up.
May in house doctor naman ang hotel sa Iloilo Business Park nga ila ginatiniran sa diin ini ang una nga ginpaidalom sa check up.
Matapos sini, gindala ang biktima sa Qualimed kag sa ulihi, ginsaylo sa Western Visayas Medical Center.
Suno kay Dr. Juanico, ginkuhaan na ang biktima sang nasopharyngeal kag oropharyngeal swab kag ginahulat na lang ang resulta halin sa Research Institute for Tropical Medicine.
Gin-athag man ni Dr. Juanico nga may standard protocol sa infection prevention ang kada hotel kag ospital rason nga wala sang dapat kahangaw-an ang mga guests ukon pasyente nga malatnan sang balatian.
Sa subong, nagakaon na ang biktima kag wala na sang anuman nga sintomas sang Coronavirus.
Gin-athag man ni Dr. Juanico nga Coronavirus free sa gihapon ang Western Visayas.
