ILOILO – Ikunsulta anay ni Iloilo Gov. Arthur Defensor Jr. sa Department of Health kun bala mahimo man nga ipatuman sa Iloilo ang mandatory quarantine sa mga pasahero gikan sa China.
Ini ang kasunod sang pagpatuman sang Cebu Provincial Government sang madatory quarantine sang mga pasahero nga halin sa China kasunod sang isa ka kumpirmado nga kaso sang Novel Coronavirus kun sa diin ang 38 anyos nga babayi nga Chinese National ang ginapahayag nga nagpanglugayawan pa sa Cebu kag Dumaguete.
Sa interview sang Bombo Radyo kay Defensor, iya ginpahayag nga daku ang mabulig sini agud nga mauntat ang paglapta sang balatian.
Suno kay Defensor, subong nga adlaw, magapatigayon sang pagsinapol ang Bureau of Quarantine officers sa bug-os ngaWestern Visayas agud istoryahan ang lihok nga himuon agud nga indi na makalab-ot sa Iloilo ang virus.
Ginpahayag ni Defensor nga mas makapaayo para sa mga Ilonggo nga ipatuman ang mandatory quarantine sa mga pasahero nga halin sa luwas sang pungsod apang ang Department of Health lang ang makadesisyon agud nga indi magginutok ang pasyante sa mga hospital.
