ILOILO – Wala pa sang lockdown sa Iloilo kasunod sang labing una nga kaso sang Novel Coronavirus sa pungsod.
Sa interview sang Bombo Radyo kay Dr. Mary Jane Juanico, pinuno sang Infectious Disease section sang Department of Health 6, iya ginpahayag nga wala sang dapat nga kahangaw-an bangud nga wala sang travel history nga nagpadulong sa Iloilo ang 38 anyos nga babayi nga Chinese National nga nagpositibo sa Novel Coronavirus.
Suno kay Juanico, wala sang dapat kahangaw-an bangud nga wala sang exposure ang mga Ilonggo sa nasambit nga balati-an apang sa pihak sini, kinahanglan sa gihapon nga mag-aligmat bangud nga ginapahayag nga nakapadulong sa Cebu kag Dumaguete ang nasambit nga pasyente nga sa subong wala na sang may ginabatyag nga balati-an.
Ginpahayag ni Juanico nga kinahanglan nga maghalong paagi sa pag-disinfect ukon paghugas sang kamot, pagsuksok sang mask, pagkaon sang vitamin-rich food kag likawan anay ang pagpadulong sa pampubliko nga lugar.
Samtang, ginpahayag naman ni Juanico nga maayo naman ang kahimtangan sang 3 ka tuig nga bata nga na-admit sa Western Visayas Medical Center.
Suno kay Juanico, wala sang exposure sa Novel Coronavirus ang bata nga nag-angkon sang hilanat apang ginpakamaayo na lang nga ipaidalom ang pasyente sa isolation agud masiguro nga indi maglala ang iya ginabatyag nga balati-an.
Tuhoy naman sa 28 ka persons under investigation kun sa diin 3 diri ang sa Western Visayas, ginpahayag ni Juanico nga lunsay negatibo sa Novel Coronavirus ang mga pasyente.
