ILOILO – Daku ang mabulig sang voluntary quarantine kag ang gilayon nga pagpakunsulta sa doktor agud nga indi na maglapta ang Novel Coronavirus.
Ini ang panugyan ni Dr. Jessie Glen Alonsabe, pinuno sang Regional Epidemiology and Surveillance Unit sang Department of Health 6, may kaangtanan sa nagadamu nga pasyente nga nakitaan sang sintomas.
Suno kay Alonsabe, kun nakabatyag sang paglain sang pamatyag, mas makapaayo nga magpakunsulta gilayon sa doktor agud nga indi maglala ang balatian kag agud nga indi makalaton sa iban.
Ginpahayag ni Alonsabe nga sa subong, ang mga impormasyon lamang gikan sa Department of Health kag ang World Health Organization ang dapat nga patihan agud nga malikawan ang panic.
May kaangtanan naman sa tatlo ka Persons Under Investigation sa Western Visayas, ginpahayag sang natungdan nga lunsay negatibo sa Novel Coronavirus ang mga pasyente.
Padayon man monitoring sa isa ka pamilya nga naghalin sa China kag nagpauli sa probinsya sang Iloilo.
