ILOILO CITY – Nagapadayon pa ang inventory sang Iloilo City Health Office agud mahibalu-an kun bala kulang ukon bastante ang supply sang face mask sa syudad sang Iloilo.
Sa interview sang Bombo Radyo kay Dr. Roland Jay Fortuna sang City Health Office kag Focal Person for Novel Coronavirus, iya ginpahayag nga may yara pa sang bilin nga stocks sang N95 masks apang may pila na ka mga supplier ang nagpahayag sang kakulang sang stocks sang face masks.
Suno kay Fortuna, padayon ang close coordination sa Department of Health may kaangtanan sa mga lihok nga pagahimuon may kaangtanan sa pagtapna sang virus ilabi na sa mga dumuluong nga nagapadulong sa pungsod.
Ginpahayag ni Fortuna nga sa bahin sang Iloilo City Hall, ginapatuman na ang pag-disinfect sang kamot agud nga indi maglaton ang balatian kag kun tani, sundon man ini sa iban nga ahensya sang gobyerno kag mga commercial establishments.
Ginatutukan man sa subong ang massive information dissemination may kaangtanan sa Novel Coronavirus.
