ILOILO – Full support ang League of Municipalities of the Philippines – Iloilo chapter sa mga lihok nga ginapatuman sang Provincial Government agud nga indi makalab-ot sa Iloilo ang Novel Coronavirus.
Sa interview sang Bombo Radyo kay Mayor Trixie Fernandez sang San Enrique, Iloilo kag Presidente sang League of Municipalities of the Philippines – Iloilo chapter, iya ginpahayag nga kinahanglan nga pabantayan ang paluparan kag ang mga pantalan agud nga indi makalusot ang mga infected person.
Suno kay Fernandez, maayo ang nangin lihok ni Gov. Arthur Defensor Jr. nga hingyuon ang pagpauntat sang international flight gikan sa mga lugar nga may kaso sang Novel Coronavirus.
Ginpahayag ni Fernandez nga isa sa gin-istyoryahan sa ila nga pagsinapol amo ang pagtukod sang Task Force on N-Cov sang tagsa ka Local Government Unit sa probinsya sang Iloilo.
Kinahanglan nga magtukod gilayon sang Task Force on N-Cov ang tagsa ka Local Government Unit agud nga matapna ang paglapta sang Novel Coronavirus.
Sa interview sang Bombo Radyo kay Department of Interior and Local Government Iloilo Provincial Director Teodora Sumagaysay, iya ginpahayag nga wala pa sang official communication halin kay Secretary Eduardo Año tuhoy sa nasambit nga mandu.
Suno kay Sumagaysay, samtang ginahulat ang Memorandum Circular, kinahanglan nga sundon gilayon ang pagtukod sang Task Force on N-Cov bilang kabahin sang pagpanghanda.
