ILOILO CITY – Suportado ni Iloilo City Lone District Rep. Julienne “Jam Jam” Baronda ang paghingyo ni Iloilo Gov. Arthur Defensor Jr. nga ipauntat ang international flights sa mga lugar nga may yara sang Novel Coronavirus.
Sa interview sang Bombo Radyo kay Baronda, iya ginpahayag nga maayo ang nangin lihok sang gobernador bangud nga kun nakapadulong sa Iloilo ang isa ka infected person, pat-ud nga madamo ang malatnan sang virus.
Suno kay Baronda, makigsapol siya sa Lunes, Pebrero 3, kay Department of Transportation Sec. Arthur Tugade kun ano pa ang dapat nga himuon sang tagsa ka Local Government Unit ilabi na sa syudad kag probinsya sang Iloilo bilang pagpanghanda.
Ginpahayag man ni Baronda nga bilang indibidwal, may yara sang katungdanan ang tagsa-tagsa agud nga makalikaw sa balati-an kag ini ang paagi sa pagtatap sang kaugalingon nga masami nga ginapanugyan sang Department of Health.
