ILOILO – Nag-umpisa na ang early registration sang Department of Education para sa school year 2020-2021.
Sa Good Morning Philippines program, ginpahayag ni Lionel Salvilla, Divion Information Officer sang Department of Education -Iloilo, nga ang early registration ang nag-umpisa kahapon Pebrero 1 tubtub Marso 6.
Suno kay Salvilla, naatrasar ang pag-umpisa sang early registration bangud nga ginhatagan sang ligwa ang Chinese New Year sang nakaligad nga semana.
Ginpahayag ni Salvilla nga may yara sang registration desk nga ginpahamtang sa private kag public nga elementary kag high school para sa mga incoming Kindergarten, Grade 1, Grade7 kag Grade 11.
Katuyu-an sini amo nga mahibalu-an sang Department of Education ang kabug-usan nga estudyante nga magapa-enroll sa school year 2020-2021.
Gina-engganyo gid ang mga out of school youth kag ang mga may yara sang kasablagan sang lawas nga magpakigbahin sa early registration agud nga maka-agum kag makapadayon sa pagtuon.
Kinahanglan nga magpa-enroll anay sa Kindergarten antes magpa-enroll sa Elementary.
Suno kay Percy Borra, Education Program Surpvisor sang Mother Tounge Based Multilingual Education, nga ang Kindergarten ang kasubong nga training sa bata antes mag-umpisa sa formal schooling.
Ang mga bata nga 5 ka tuig sa Hunyo 1 tubtub Agosto 1, ang ginapanugyanan nga magpakigbahin sa early registration para sa Kindergarten agud nga gilayon nga makapaidalom sa assessment.
Ang pag-eskwela suno kay Borro ang isa ka developmental milestone sa kabuhi nga wala sang shortcut agud mahibalu-an ang ikasarang sang isa ka bata.
Maayo nga kahigayunan ang Alternative Learning System para sa mga Out of School Youth nga maluyag magtuon sang basic literacy ukon magpadayon sa pag-eskwela.
Suno kay Juan Adlai Caigoy, Education Program Supervisor sang Alternative Learning System, may yara sang nanari-sari nga programa nga ginatanyag ang Department of Education para sa mga Out of School Youth nga maluyag magpadayon sa pagtuon.
Ginpahayag ni Caigoy nga may yara sang programa nga para sa mga maluyag magtuon sang pagbasa, pagsulat ukon pag-isip kag may yara man para sa mga maluyag magpadayon sa Elementary kag High School.
Ang mga ALS passer ang ginahatagan sang diploma bilang pamatuod kag mahimo magamit sa pagpa-enrol sa High School, College kag Technical Vocational Course.
Nagakinahanglan naman sang espesyal nga pagtatap kag pagtudlo ang mga estudyante nga yara sa Special Education.
Suno kay Abraham Imas, Education Program Supervisor sang Special Education, ang mga estudyante nga nagapa-enrol sa nasambit nga education program amo ang mga may yara sang kasablagan sa lawas kasubong sang bulag, bungol, apa kag ang mga may yara sang special needs.
Ginpahayag ni Imas nga sa Divion of Iloilo, may yara sang 53 ka implementors kag 11 ka Special Education centers.
Antes batunon, kinahanglan nga may yara sang assessment gikan sa doktor nga nagapamatuod nga ang estudyante ang indi makasarang sa formal schooling.
Bangud nga mahal ang pagkuha sang medical assessment, may yara sang walo ka manifestations nga ginasunod ang mga manunudlo agud mahibalu-an nga ang estudyante ang may yara sang special needs.
