ILOILO CITY-Gindismiss sang Commission on Elections ang instant election protest nga gin-file ni anay 4th District Congressman Ferjinel Biron batok kay Governor Arthur Toto Defensor Jr.
Ang duha ang nagbungguanay sa pagka-gobernador sang probinsya sang May 2019 elections.
Sa interview sang Bombo Radyo kay Governor Defensor, iya ginpahayag nga santo sa resolution nga ginpapanaog sang komisyon nga napetsahan Enero 14, wala sang bastante nga ebidensiya nga napresentar ang kampo ni Biron rason nga gindismiss ang iya panumbungon sang lapnagon nga dinayaay batok kay Defensor.
Matandaan nga sa ginpasaka nga election protest ni Biron, iya gintumod ang isyu sa lapnagon nga vote-buying, arbitrary omission sang mga pangalan sang mga identified Biron voters gikan sa listahan sang registered voters, kag reported pre-shaded nga ,mga balota nga naga-pabor kay Defensor.
