ILOILO CITY – Magpati lamang sa impormasyon gikan sa Department of Health kag sa World Health Organization agud nga malikawan ang panic may kaangtanan sa Novel Coronavirus.
Ini ang panugyan sa publiko ni Dr. Roland Jay Fortuna, Focal Person for Novel Coronavirus sang Iloilo City Health Office, agud nga malikawan ang pagsalangisag.
Sa interview sang Bombo Radyo kay Dr. Fortuna, iya ginpahayag nga ang update may kaangtanan sa Novel Coronavirus ang naka-post sa website sang Department of Health kag sang World Health Organization.
Suno kay Dr. Fortuna, indi gilayon magpati sa mga impormasyon sa social media ilabi na kun indi reliable ang source sini.
Ginpahayag ni Dr. Fortuna nga kun local update ang luyag mahibalu-an, ang Department of Health ang source sang impormasyon kag ang World Health Organization naman ang source kun international update ang pagahambalan.
Sa subong, liwat nga ginpanugyan sang natungdan nga dapat sundon ang proper hygiene kasubong sang paggamit sang mask ilabi na kun naga-ubo kag kinahanglan nga regular nga maghugas sang kamot.
