ILOILO CITY – Naga-ayo sang dugang nga tion si Iloilo City Councilor Jojo Javellana, chairman sang Police, Fire, Penology, Public Safety, Order and Security sa Sangguniang Panglungsod, antes makahatag sang pahayag tuhoy sa imbestigasyon sa natabo nga twin shooting incident.
Ini matapos nga tubtub subong, wala pa sa gihapon nakilala ang mga suspek sa pagluthang-patay kanday Alain Muller kag Delfin Britanico nga lunsay nalubong na sang damlag lang.
Sa interview sang Bombo Radyo kay Javellana, iya ginpahayag nga madamo sang alegasyon kag motibo tuhoy sa natabo sa mga biktima apang indi niya mahimo nga ibuyagyag ang impormasyon bangud nga nagapadayon pa ang imbestigasyon sang Iloilo City Police Office kaupod ang team sang National Bureau of Investigation.
Suno kay Javellana, personal nga naghingyo sa iya si Iloilo City Police Office Director Police Col. Martin Defensor Jr., nga indi lang pagpangunahan ang pagbuyagyag sang impormasyon.
Ginpahayag ni Javellana nga magasapol pa ang Iloilo City Council kaupod ang otoridad agud istoryahan ang development sa kaso sang twin shooting incident.
Nagpromisa man ang natungdan nga siya mismo ang magapahibalo sang kabug-usan nga detalye kun may yara na sang pahanugot gikan sa otoridad.
