ILOILO CITY- Ginpa-bombo sang mga trisikad drivers sa banwa sang Dumangas ang iligal nga pagbyahe sang mga e-bikes.
Sa interview sang Bombo Radyo kay Ricky Diaz iya ginpahayag nga tuman ka apektado ang ila byahe bangud sa operasyon sang mga e-bikes sa banwa.
Suno sa iya,ang sadto kapin 400 pesos nila nga kita sa isa ka adlaw ang nahimo nalang nga masolosobra 100 pesos.
Ang ginalain pa sang ila buot amo nga ginatugutan sang Local Government Unit sang banwa ang iligal nga operasyon sang mga e-bikes.
Suno pa sa iya, madugay na nila nga ginareklamo ini apang kaangay nga wala sila ginapamatian sang banwa.
Nagsabat naman si Mayor Ronaldo Onal Golez sa reklamo sang mga trisikad driver.
Suno kay Mayor Golez, bangud sa human consideration kun ngaa gintugutan nila ang operasyon sang mga e-bikes.
Suno sa iya, ang mga nagabyahe sang e-bikes amo man ang nagabyahe sadto sang trisikad apang mas ginpili nga magbyahe nalang subong sang e- bikes.
Wala naman naglaum si Golez nga magareklamo ang mga driver sang trisikad bangud suno sa iya, sa ginpatigayon nga meeting upod sa mga drivers, wala man sila nagpabutyag sang pagpamatok kag ini ang ginpanginwala naman sang mga trisikad drivers.
Magapatawag naman sang emergency meeting buas, Pebrero 6 si Mayor Golez agud mahisayran ang reklamo sang mga natungdan.
